د زابل ولايت شملزو ولسوالۍ ځنځير سيمې ته سفر.
۷/رجب المرجب
د سرحدونو،قومونو او قبایلو چارو وزارت سرپرست وزير الحاج ملا نورالله (نوري) چې د زابل مرستيال والي ملا سليمان اغا بهير او ددې ولايت د س.ق.ق چارو رئيس سحر اخندزاده يې هم ملتيا کوله شملزو سرحدي ولسوالۍ ته سفر تر سره کړ.
ښاغلي نوري د شملزو ولسوالۍ له سرحدي کنډک، ډيورنډ فرضي کرښې، سرحدي پوستو او د ځنځير په سيمه کې د نوې رسمې شوې ترانزیټي لارې څخه له نژدې ليدنه وکړه.
د سرحدي کنډک قومندان ښاغلي ارماني د امنيتي وضعيت او په ياده سېمه کې د مېشتو مجاهدينو د ستونزو په اړه لنډ جريان شريک کړ او د همکارۍ غوښتنه يې وکړه.
ددې سفر په جريان کې ښاغلي سرپرست وزير د ځنځير بازار او شملزو ولسوالۍ د ځينو نورو سېمو له مشرانو سرههم د يوې ناستې په ترڅ کې وکتل.
حاجي قمرالدين او حاجي نادر د لارې، کلينکونو، مکتبونو او مدرسو تر څنګ د کرهڼې، مالدارۍ او د څښاک پاکو اوبو د نشتون ځينې ستونزې يادې کړې.
د سرحدونو،قومونو او قبایلو چارو سرپرست وزير الحاج ملا نورالله نوري د شملزو سرحدي ولسوالۍ د خلکو مشروع غوښتنو په اړه ډاډ ورکړ چې له اړوندو ارګانو سره به شريکې شي او هيله يې څرګنده کړه چې اسلامي امارت به ورته ځانګړې پاملرنه کوي.
