د دعوت او ارشاد رياست مسؤلينو د خوشحال خان عالي ليسې له استادانو او ادارې کار کوونکو څخه د سیرت النبي ﷺ ازموینه واخیسته
چهارشنبه ۱۰ ربیع الآخر ۱۴۴۸
د سرحدونو، قومونو او قبایلو چارو وزارت د دعوت او ارشاد رياست مسؤلينو د ښوونې او روزنې رياست داستازو په همغږي د دغه وزارت اړوند خوشحال خان عالي لېسه کې د یادې لېسې د مسؤلينو په حضور کې د سیرت النبي ﷺ ازموینه واخیسته.
په دغه ازموینه کې د لېسې هغو ګڼ شمير استادانو او اداري کارکوونکو ګډون کړی وو، چې د نبي کریم ﷺ د صورت او سیرت په تړاو ورته د ځانګړي کتاب تدريس او درس ورکول شوی و.
د یادې ازموینې د پيل پرمهال د وزارت د دعوت او ارشاد رياست پلاوي د ازموينې پر څرنګوالي رڼا واچوله او همداراز يې د نبي کريم ﷺ د صورت او سيرت ارزښت ګډونوالو ته روښانه کړ. دوی هغه خلک په دنيا او آخرت کامياب خلک وبلل، چا چې ځان او کورنۍ په نبوي تګلاره او اخلاقو سمبال کړي وي.
ياده دې وي، چې دازموینو د پايلو په نتيجه کې به د لوړو نمرو اخیستونکي استادانو او ادارې کارکوونکو ته ځيني مالي او معنوي ډالۍ هم ورکول شي.
