باميان ولايت کې د تاجک او هزاره قوم ترمنځ دوه کلنه دښمني پای ته ورسېده
دوشنبه ۲۸ جمادی الأولی ۱۴۴۸
د باميان ولايت مرکز اړوند په توپچي سيمه کې د دوو لويو قومونو ترمنځ د ځينو خپلمنځي مسائلو پر سر راپورته شوې دښمني، چې په پايله کې يې د مالي زيانونو سربېره له يوه طرفه يو کس خپل ژوند بايللی و، د دغه ولايت د سرحدونو، قومونو او قبايلو چارو آمريت د مسؤلينو، ولايتي ادارې د مشرانو او قومي استازو په هڅو پای ته ورسېده.
د روغې جوړې د مراسمو پرمهال مسؤلينو په خپلو خبرو کې د اتحاد او اتفاق پر ارزښت ټینګار وکړ او ویې ویل: اتحاد د یوې ټولنې د عزت، سرلوړۍ او پرمختګ بنسټیز لامل دی. کله چې خلک د ورورولۍ، خواخوږۍ او یووالي په روحیه د یو بل ترڅنګ ودرېږي نو د سولې لپاره مناسب فرصتونه برابرېږي.
په پای کې د دواړو خواوو استازو د مصلحينو په حضور کې يوبل ته د ورورولۍ او بښنې غيږې ورکړې او ژمنه يې وکړه، چې په راتلونکي کې به په خپلو منځونو کې هېڅ ډول تاوترېخوالي ته زړه نه ښه کوي، بلکې د ورورولۍ ژوند ته به دوام ورکوي.
