په کاپیسا او پروان کې څلور دښمنې کورنۍ پخلاينې ته راوګرځېدې

شنبه ۶ ربیع الآخر ۱۴۴۸

د کاپيسا ولايت په اله سای ولسوالۍ کې د دووکورنيو ترمنځ د تېرو ۸ کلونو په دوام راونه دښمني، چې په ترڅ کې يې يو کس وژل شوی و او ژور خپلمنځي اختلافات يې ناحله پاتي وو، د دغه ولايت د سرحدونو، قومونو او قبايلو چارو آمريت د مسؤلينو له لوري د قومي مشرانو په هلو ځلو پای ته ورسېده.

دغه دښمني، چې د ځمکو د ملکيت پر سر راپورته شوې وه، مسؤلينو د څو ناستو پرمهال وارزوله، له ښکېلو خواوو يې واکونه واخېستل او د يوې منځګړې فيصلې په کولو سره يې د هغوی ترمنځ د بښنې او حق ورکولو زمينه برابره کړه.

په همدې حال کې د پروان ولايت په سالنګ ولسوالي کې د څو تنو هېوادوالو ترمنځ د يوې لفظي شخړې له کبله د اخ ډب په ترڅ کې د يو کس د وژنې له وجی پېښه شوې بدی د ياد ولايت د سرحدونو، قومونو او قبايلو چارو آمریت د مسؤلینو او علماوو ، مخورو په شتون کې په دوستي بدله او ښکېلو لوريو روغه جوړه سره وکړه