په پلازمېنې کابل کې د ولسواليو په کچه له ولسي خلکو سره غونډې
شنبه ۱۰ جمادی الأولی ۱۴۴۷
دغه غونډې، چې د اسلامي ورورولۍ او د خلکو د ستونزو اورېدو تر سرليک لاندې پيل شوې دي د سرحدونو، قومونو او قبايلو چارو وزارت په مشري د ياد وزارت د جرګو او قبايلي چارو د همغږۍ رئيس شيخ نيک محمد افغاني له لوري د خاک جبار ولسوالي په مرکز او چينار کلي کې له مسؤلينو، قومي مشرانو، علماوو، ځوانانو او ګڼو ولسي خلکو په حضور کې ترسره شوه.
د يادې غونډې له لارې قومي مشرانو او عامو خلکو په خپلو خبرو کې ځايې سيمه ييزې ستونزې شريکې کړې او د هغې د حل غوښتنه يې وکړه. يادو قومي مشرانو د اسلامي امارت کلک ملاتړ څرګند کړ او ژمنه يې وکړه، چې په هرحالت به د دې شرعي نظام ترشا دريږي. دوی له مسؤلينو وغوښتل، چې خاک جبار ولسوالي ته خاصه پاملرنه وکړي.
د غونډې پرمهال د جرګو رئيس ښاغلي افغاني د ولسي خلکو ستونزې واورېدې او د حل په موخه د ډاډ څرګندولو ترڅنګ يې وويل: زموږ وزارت د هيواد په ليري پرتو سيمو کې هم د خدمتونو په ترسره کولو بوخت دی، چې د شخړو حل، د سړکونو، مسجدونو، روغتيا او لسګونه نورې پراختیايي پروژې د همدې وزارت له لوري ترکار لاندې دي. نوموړي همداراز خلکو ته د اميرالمؤمنين حفظه الله وروستی فرمان تشريح کړ، چې موخه يې د ټولنې د ناسمو رواجونو او بې ځايه لګښتونو له منځه وړل دي.
