د غزني، پکتیا، پکتیکا، خوست او لوګر قومي مشرانو, علماوو د سرحدونو، قومونو او قبايلو چارو له وزير سره وکتل.
پنج شنپه ۱۳۴۰/۶/۱۵
دغو قومي مشرانو په خپلو خبرو کې وویل: ولسونه له ا.ا.ا سره اوږه په اوږه ولاړ دي او هیچا ته به اجازه ورنکړي چې د اسلامي نظام پر وړاندې ودرېږي، دوی د قومونو د یووالي او د ولسونو د ستونزو د حل په برخه کې د سرحدونو، قومونو او قبایلو چارو وزارت هڅې وستایلې او مننه یې وکړه چې د دوی ستونزې ددې وزارت له لوري د حل په منظور له لوړو مقاماتو سره شریکېږي.
همداراز یادو قومي مشرانو او علماوو د خپلو ولایتونو د اوسېدونکو د ستونزو د حل په موخه خپل وړاندیزونه هم له ښاغلي نوري سره شریک کړل او د حل کېدو غوښتنه یې وکړه.
محترم الحاج ملا نورالله نوري د یادو ولایتونو قومي مشرانو او سپین ږیرو ته د ښه راغلاست پر مهال وویل: د سرحدونو، قومونو او قبایلو چارو وزارت ددې لپاره جوړ دی چې ولسونه خپلې ستونزې له دې لارې له نورو ادارو سره شریکې کړي، نوموړي زیاته کړه: ا.ا.ا د یوه مسؤل نظام په توګه د ولسونو وړاندیزونو ته د قدر په سترګه ګوري او د مشکلاتو د حل لپاره یې هلې ځلې کوي، ښاغلي نوري قومي مشرانو ته ډاډ ورکړ چې ستونزې به یې د اسلامي امارت له لوړو مقاماتو سره شریکوي او د حل کولو هڅه به یې کوي.
