په کاپیسا ولایت کې ۲۲ کلنه بدي په دوستي بدله شوه
د کاپیسا ولایت په تګاب ولسوالۍ کې د صوفیان او میاخیل کلیو د دوو کورنیو ترمنځ پېښه شوې دُښمني د یاد ولایت د سرحدونو، قومونو او قبایلو چارو آمریت، د شخړو د حل کمېسیون او محلي سپین ږیرو په همکاري حل شوه.
یاده شخړه چې ۲۲ کاله مخکې د جوزو (چهارمغزو) د حاصلاتو پر سر رامنځته شوې وه او له یوه طرف څخه پکې یو کس هم وژل شوی و، د دواړو لوریو له قناعت څخه وروسته د یوې ناستې په صورت کې په دوستي بدله شوه، چې پر مهال یې مصلحینو او دیني عالمانو د شخړو په بدو پایلو خبرې وکړې او بدي یې د نسلونو تباهي یاده کړه.
د غونډې په لومړیو کې د شخړو د حل کمېسیون یوه استازي مولوي عبدالمقیم عزیزي او نورو مسؤلینو د موضوع په اړه هر اړخیزې خبرې وکړې. ورپسې د طرفینو په اړه کښل شوې فیصله په لوړ غږ ولوستل شوه او دواړه لوري یې منلو ته راوبلل. په وروستیو کې دواړه لوریو ژمنه وکړه چې له ورور وژنې به لاس اخلي او یو له بل سره به په خوښي ژوند کوي.
