په کاپيسا ولايت کې قومي جرګه راوغوښتل شوه
چهارشنبه ۱۴۴۴/۳/۲
د کاپيسا ولايت د سرحدونو، قومونو او قبایلو چارو آمريت له لوري د (خلکو او کوچيانو ستونزو ته رسيدنه) تر نامه لاندې ستره قومې جرګه راوغوښتل شوه.
په دې جرګه کې چې تر ۳۰۰ تنو پورې قومي مخورو، کوچي سرخيلانو، علماء کرامو او ځوانانو ګډون درلود د کوچيانو او ځايي قومونو پر ستونزو او مشکلاتو خبرې وشوې.
په دې جرګه کې د کاپيسا ولايت والي محترم قاري احسان الله بريال، د سرحدونو، قومونو او قبايلو چارو آمر ملا صديق الله صياد او د نورو ارګانونو رئيسانو هم ګډون کړی وو.
جرګه په تلاوت سره پيل شوه، ورپسې ښاغلي صياد له مرکز او ولسواليو څخه راغلو ګډونوالو ته ښه راغلاست ووايه، د غونډې اجنډا يې واوروله او د قومي مخورو ګډون او هميشنۍ همکاري يې وستايله.
مولوي نازکمير او د امام ابوحنيفه مدرسې مهتمم مولوي عبدالمقيم د قومي جرګو او دوديزو پرېکړو ارزښت او په مشورو د ستونزو حل پر اهميت خبرې وکړې، ښاغلي مولوي عبدالمقيم د کوچيانو د څړځايونو، هستوګنځايونو، روغتيايي خدمتونو او تعليم او تربيې ستونزې يادې کړې چي د کاپيسا کوچي ولس ورسره لاس او ګريوان دی.
د غونډې ګډونوالو د ښاغلي صياد د هڅو ستاينه وکړه چي تل يې د ولس ستونزو ته رسيدنه کړې او غږ ته يې انعکاس ورکړی.
په پای کې د کاپيسا والي ښاغلي قاري بريال وينا وکړه، او ويې ويل: موږ د خلکو خدمت د ځان مسؤليت بولو، هر وخت مو د ټولو حکومتي دوايرو دروازې ستاسو پر مخ خلاصې دي، موږ تل په دې هڅه کې يو چې ستاسو ستونزو ته رسيدنه وکړو.
جرګه د يووالي او ورورولۍ په دعا پاي وموند.
