زما هڅه داده، چې د ولسونو ستونزې او غوښتنې له نږدې واورم او د حل لارې چارې ورته ولټوم!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې د پکتیکا ولایت له یو شمېر قومي مشرانو او مخورو سره د کتنې په ترڅ کې وکړې.
په دې کتنه کې راغلو قومي مشرانو او مخورو خپلې یو لړ سیمه ییزې ستونزې چې د پوهنې، روغتیا، پراختیایي پروژو د تطبیق او ورته نورو برخو کې وې د حل په موخه یې له ښاغلي صمیم سره شریکې کړې، دوی دغه راز د نظام، جمهوریت او د تلپاتې اوربند په اړه په مرکز او ولایتونو کې د لویو ولسي غونډو په جوړولو کې د وزارت د مشرتابه هڅې وستایلې او ددغه شان ولسي جرګو د جوړولو په دوام یې ټینګار وکړ.
ورپسې ښاغلي محب الله صمیم د خپلو خبرو په ترڅ کې د یادو قومي مشرانو ستونزې پر ځای وبللې وې ویل: د پکتیکا ولسونو تل د نظام او لوړو ملي ګټو ملاتړ کړی او په دې برخو کې یې نه ستړې کېدونکې هلې ځلې ترسره کړي، دغه راز یې راغلو مشرانو ته ډاډ ورکړ، چې ستونزې به یې د حل په موخه له اړوندو ادارو سره شریکې کړي.
