له قبایلي ځوانانو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې وروسته له یو شمېر قبایلي خوانانو سره د خپل کار په دفتر کې وکتل.
په دې کتنه کې، راغلو قبایلي ځوانانو په بېلابېلو برخو په تېره بیا د زده کړې په برخه کې د خپلو یو لړ ستونزو شریکولو ترڅنګ د وزارت له مشرتابه څخه وغوښتل، چې قبایلي ځوانان دې د زده کړې په موخه د وزارت اړوندو لېسو کې شامل کړي دغه راز یې د فرهنګي او کلتوري اړیکو د پیاوړتیا، د امن، یووالي او ثبات لپاره په ګډو هلو ځلوټینګار وکړ.
یادو ځوانانو د سولې، ملي یووالي، د ناامنو او قبایلي سیمو ځوانانو ته د زده کړې د زمینې برابرولو او له قومي مشرانو سره د سلامشورو په برخو کې د سرحدونو او قبایلو چارو وزارت د مشرتابه هلې ځلې وستایلې.
ورپسې د سرحدونو او قبایلو چارو وزیر ښاغلي محب الله صمیم په خپلو خبرو کې د یادو قبایلي ځوانانو ستونزې پر ځای وبللې وې ويل: افغانستان د ټولو مېشتو درنو قومونو او قبایلو ګډ کور دی او د قبایلو مېړانه او سر ښندنه، چې په تاریخ کې یې ترسره کړې ټولو ته روښانه ده، انشاالله ستونزې به مو د اړوندو ادارو سره د حل په موخه شریکې کړم او ځوانانو ته به د زده کړې په برخه کې اسانتیاوې رامنځته کړم.
