په زابل کې د دوو کورنیو ترمنځ ۸ کلنه دښمني په دوستۍ بدله شوه
پنجشنبه، ۱۷ جمادیالاول ۱۴۴۸ هـ ق
د زابل ولایت ارغنداب ولسوالۍ د میدان سیمې د دوو کورنیو ترمنځ هغه دښمني چې له تېرو ۸ کلونو راهیسې روانه وه، د دغه ولایت د سرحدونو، قومونو او قبایلو چارو رئیس مولوي رحمت الله جواد په هڅو او د دیني عالمانو، قومي مشرانو او سیمه ییزو مسؤلینو په منځګړیتوب د روغې جوړې له لارې پای ته ورسېده.
منځګړو په یوه ناسته کې د دواړو کورنیو ترمنځ د یادې دښمنۍ پر لاملونو او پایلو خبرې وکړې او همداراز یې د سیمه ییزو مشرانو او مخورو په مشورو، د قضیې د حل او روغې جوړې په موخه پرېکړه وکړه او ټینګار وکړ چې دواړه لوري باید د شوې پرېکړې درناوی وکړي او د هغې خلاف له هر ډول اقدام څخه ډډه وکړي.
په پای کې، دواړو کورنیو د منځګړو پرېکړه په خوښۍ ومنله او ژمنه یې وکړه چې د شوې پریکړې درناوی به کوي او د هر ډول سرغړونې په صورت کې به د نافذه اصولو له مخې قانوني چلند مني
