د غربي نورستان لرې پرتې ولسوالۍ منډول ته سفر
شنبه/۱۶/ شوال المکرم/ ۱۴۴۴
د سرحدونو،قومونو او قبایلو چارو سرپرست وزير الحاج ملا نورالله نوري او ورسره مل پلاوي د غربي نورستان منډول ولسوالۍ ته د سفر په ترڅ کې د یادې ولسوالۍ له ولسونو، قومي مخورو او دیني عالمنانو سره د یادې ولسوالۍ په مرکز کې وکتل.
په دغه کتنه کې د یادې ولسوالۍ د خلکو په استازولي څو تنو خبرې وکړې او د ورغلي پلاوي یې ګرم استقبال وکړ. هغوی د منډول ولسوالۍ یوه صعب العبوره ولسوالۍ یاده کړه، له حکومت څخه یې د یادې ولسوالۍ دلارې په رغولو ټېنګار وکړ او د معارف، روغتیا، کرنې او مالدارۍ په برخو کې یې له حکومت څخه د پاملرنې او همکاري غوښتنه وکړه.
ورپسې د یاد وزارت سرپرست ښاغلي نوري وويل: نورستان هغه ولايت دی چې تل يې د جهاد سنګرونه پخپلو وينو ګرم ساتلي او د يرغلګرو په وړاندې يې قربانۍ ورکړې دي. نوموړي د خلکو له ګرم هرکلي څخه مننه وکړه او د دوئ د ستونزو اورېدل او حل ورته راپيدا کول يې خپله وجيبه یاده کړه.
د منډول ولسوالۍ له مرکز پارون ښار څخه د لیرې والي او سرک د خام والي له کبله له ګڼو خدمتونو څخه محرومه پاتې شوې ده. د دغې ولسوالۍ اکثره وګړي په مالدارۍ او کرنې بوخت دي. دوی وایي: د سرحدونو قومونو او قبایلو چارو سرپرست وزير لومړنی لوړ رتبه کس دی چې زموږ پوښتنې ته راغلی دی او د خلکو غږ له نژدې اوري، دوی د ورغلي پلاوي له ورتګ څخه ډېره زیاته خوښي څرګنده کړه او خپلې ستونزې یې له نژدې ورسره شریکې کړې.
