په بلخ او ارزګان کې د جلاجلا شخړو حل
شنبه ۲۶ جمادی الأولی ۱۴۴۸
د بلخ ولايت د سرحدونو، قومونو او قبايلو چارو رياست رئيس مولوي سردار محمد محمدي په هڅو او د ځايي قومي مشرانو په منځګړيتوب د ياد ولايت په شولګرې ولسوالۍ کې د دوو کورنيو ترمنځ د ځينو خپلمنځي مسائلو پر سر راپورته شوې شخړه په سوله او ورور ولي بدله شوه.
د دغې رامنځته شوې شخړې په پايله کې له يوه لوري يوکس خپل ژوند له لاسه ورکړی و، چې له کبله يې دواړو خواوو ته لوی مشکلات ايجاد کړي وو.
په ورته مهال د ارزګان ولايت د سرحدونو، قومونو او قبايلو چارو رياست مسؤلينو د دغه ولايت په مرکز ترينکوټ کې د دوو کورنيو ترمنځ هغه راپورته شوې شخړه هواره کړه، چې په ترڅ کې يې درې تنه ټپيان شوي وو او د ګڼو خپلمنځي مشکلاتو ترڅنګ يې لوی مالي تاوانونه پېښ کړي وو.
د يادو دواړو شخړو د هواري پرمهال مسؤلينو ښکېل لوري د صبر، زغم او بښنې کولو پر اهميت وپوهول او له هغوی يې وغوښتل، چې د ستونزو او جنجالونو پرمهال له حوصلې کار واخلي.
