په هلمند لښکرګاه کې ستره ولسي غونډه
۱۱/رجب المرجب/۱۴۴۴ هـ ق
د سرحدونو قومونو او قبایلو چارو وزارت د جرګو معنيت له لورې په لښکرګاه کې ستره ولسي غونډه جوړه شوه. ياده غونډه چې د سرحدونو، قومونو او قبایلو چارو سرپرست وزير الحاج ملا نورالله نوري، د جرګو معين الحاج ملا عبدالخالق عابد، ورسره مل پلاوي او ولايتي مسوولينو سربېره د هلمند ولايت د ټولو ولسواليو څخه راغلو سلګونو علماء کرامو او قومي مشرانو ګډون درلود د ولايت مقام د غونډو په تالار کې ترسره شوه. د ولسواليو او مرکز په نمايندګي څو تنو عالمانو او قومي مشرانو خبرې وکړې، دوئ ځينې ستونزې او غوښتنې شريکې کړې. د سرحدونو، قومونو او قبایلو چارو سرپرست وزير الحاج ملا نورالله نوري غونډې ته وينا وکړه. نوموړي وويل: د ټول افغانستان خلکو خصوصا د هلمند ولسونو داسې چاپې او وحشتونه وليدل چې موږ يې له بيانولو عاجز يو.
د جهاد برکت وو چې په هيواد کې مو اوس اسلامي نظام راغلی او امنيت تأمين دی، د هر چا حقوق خوندي دي. ښاغلی نوري زياته کړه د سرحدونو، قومونو او قبایلو چارو وزارت د ولس او حکومت تر منځ پُل دی، دغه وزارت د ولسونو ستونزې اوري او د حل په موخه ورته رسیدنه کوي د هیواد په کچه د ټولو، قومي شخړې هواري په ترڅ کې مو تر اوسه ۱۷ قومي منازعات حل کړي چې د نورستان ولايت د ۹۱ کلونو د بدۍ روغه جوړه يې دبيلګې په توګه ياده کړه. د یاد وزارت د جرګو معين الحاج ملا عبدالخالق عابد دا نظام په هیواد کې د ټولو قومونو د قربانیو لاسته راوړنه ده دا نظام په ډيرو قيمتي وينو تر لاسه شوی نو ساتنه يې پر ټولو فرض ده. په وحدت او يووالي به د نظام ملاتړ کوو.
