په ننګرهار ولایت کې شخړه حل شوه
۱۴۴۵/۱۰/۲۴
د ننګرهار ولایت د دره نور ولسوالۍ د اطرافان سیمې او د کڼړ ولایت د ګل درې ولسوالۍ د دوو کورنیو تر منځ رامنځته شوې شخړه چې په ترڅ کې یې یو تن وژل شوی او یوه کوچنی نجلۍ ګروګان نیول شوې وه، تېره ورځ د سرحدونو، قومونو او قبایلو چارو ریاست او سیمه ییزو قومي مشرانو په همکارۍ حل شوه.
د یادې شخړې د حل په غونډه کې د سرحدونو، قومونو او قبایلو چارو ریاست د جرګو او قبایلو چارو آمر مولوي فضل امین امین د بښنې د فضیلتونو په اړه خبرې وکړې او د قضیې ښکېل لوري یې ورورولۍ ته را وبلل.
د غونډې په وروستیو کې مسؤلینو او قومي مشرانو د شخړې د دواړو غاړو تر منځ د خیر پرېکړه وکړه او ښکېلو لوریو یو بل ته د خوښۍ غېږه ورکړه. ناسته د دعائیې په لوستلو پای ته ورسېده.
