پکتيا کې د څه باندې درې لسيزو مرګوني بدي په دوستي بدله شوه
چهار شنبه ۱۵ محرم الحرام ۱۴۴۸
د پکتیا ولایت احمداباد ولسوالي اړوند د سدخېلو قوم د اځک خېلو په کلي کې د دوه کورنیو ترمنځ ۳۴ کلنه بدي، چې له يوه طرفه یوتن پکې وژل شوي و د ياد ولايت د سرحدونو، قومونواو قبایلو چارو ریاست د استازو او د دغه ولايت د قومونو دستونزو د حل اوفصل کمېټې په هلو ځلو پای ته ورسیده.
هغه مراسم چې په همدي موخه د احمداباد ولسوالي د سدخیلو په سیمه کې جوړشوي وو د بېلابېلو قومونو ګڼ شمیرعلماوو، قومي مشرانو، مخورو او ځوانانوپکي ګډوم درلود. د مراسمو پرمهال مسؤلينو دعفوې کولو او صلحې د اهمیت پر ارزښت د اسلام د مبین دین له نظره ګډونوال وپوهول، يادو مسؤلينو له خلکو وغوښتل، چې د شخړو او بديو پرمهال له زغم او حوصلې کار واخلي.
په پای کې د جرګه کوونکو مشرانو د پرېکړې له مخې د ښکېلو کورنيو مشران سره غاړه غړۍ شول او تعهدونه ترې واخېستل شول، چې له دې ورورسته به له يو بل سره هېڅ ډول تاوترېخوالی نه تر سره کوي.
د يادو کورنيو استازو هم د اسلامي امارت د مسؤلينو له هڅو مننه وکړه، چې په وينا يې د دوی د لسيزو دښمني يې د خبرو اترو او سولې له لارې حل او فصل کړه.
