بلخ کې د ۱۰ کلنې شخړې سر بېره هرات کې څلور کلنه او بغلان کې هم شخړه حل شوه
پنجشنبه ۱۶ محرم الحرام ۱۴۴۸
د بغلان ولايت په مرکز پلخمري کې د څو کورنيو ترمنځ راپورته شوې شخړه، چې يو کس پکې وژل شوی و او ګڼې خپلمنځي ستونزې يې را ولاړې کړې وې د دغه ولايت د سرحدونو، قومونو او قبايلو چارو آمريت له لوري هواره او دواړه کورنۍ سره پخلا شوې.
همداراز د بلخ ولايت په دهدادي ولسوالي کې د ځينو کورنيو ستونزو پر سر راپورته شوې لس کلنه شخړه، چې دواړو لوريو ته يې لوی اختلافات پيدا کړي وو او دهغوی ژوند يې نا آرامه کړی و، د ياد ولايت د سرحدونو، قومونو او قبايلو چارو رياست د مسؤلينو په همکارۍ حل او دواړه خواوې د دوستي په ټغر سره کېناستې.
په ورته مهال د هرات ولايت د سرحدونو، قومونو او قبايلو چارو رياست مسؤلينو د قومي مشرانو په ملتيا په دغه ولايت کې هغه څلور کلنه کورنۍ شخړه هواره کړه، چې وخت ناوخت به يې يو بل ته ستونزې جوړولې او د خپلمنځي تاوترېخوالي له امله يې سره جلا شوي وو.
