په بلخ او دايکندي ولايتونو کې دوه مختلفې شخړې هوارې شوې
پنجشنبه ۱۴۴۶/۴/۲۸
د بلخ ولايت په دولت اباد ولسوالۍ کې د دوو کورنيو ترمنځ د ميراث پر سر راپورته شوې شخړه د دغه ولايت د سرحدونو، قومونو او قبايلو چارو رياست په هماهنګۍ، د شخړو د حل کميټې، علماوو، قومي مشرانو او ځايې خلکو په همکارۍ حل اوفصل شوه او دواړه کورنۍ سولۍ ته راضي شوې.
دغو کورنيو چې له تېرو دوه کلونو په خپلو منځونو کې د ميراث پرسر ژور اختلافات لرل او وخت ناوخت به يې پري جنجالونه کول لومړی د میراث په حقونو وپوهول شول او بيا يې موضوع په سوله ييزه توګه حل شوه، چې دواړه خواوې پرې راضي شوي.
په همدي حال کې د دايکندي ولايت په مرکز کې د څړځايونو پرسر د دوو کورنيو ترمنځ هغه دوه کلنه شخړه هواره شوه، چې له مخې يې دواړو لورو ته ستونزې جوړې شوې وې. د ياد ولايت د سرحدونو، قومونو او قبايلو چارو آمريت په هڅو او د قومي خلکو په همکارۍ د يوې کمېټې له لارې سېمه وکتل شوه او بيا د يوې عادلانه فيصلې په ترڅ کې دواړه لورې سره پخلا شول.
د سرحدونو، قومونو او قبايلو چارو وزارت د خپلو ولايتې ادارو په همغږۍ تل هڅه کوي، چې ورته شخړې حل اوفصل کړي او ولسونو ته د ارام ژوند زمېنه برابره کړي.
