زده کوونکو ته د لوړو زده کړو برابرولو په موخه ناسته وشوه
۲/۲/۱۴۴۵
د هیواد د لرې پرتو زده کوونکو لپاره د لوړو زده کړو په برخه کې د اسانتیاوو را منځته کولو په موخه د سرحدونو، قومونو او قبایلو چارو وزارت مسلکي مرستیال مولوي احمد طه قادري، د لوړو زده کړو وزارت د محصیلانو چارو له مرستیال مفتي محمد طاهر احمد او مل پلاوي سره په خپل کارځای کې وکتل.
په دغه ناسته کې مسلکي مرستیال ښاغلي قادري او د دغه وزارت د ښوونې او روزنې رئیس مولوي عبدالرحمن رحماني د زده کوونکو د جذبولو او د هغوی د ستونزو د حل کولو په اړه خبرې وکړې او د لوړو زده کړو وزارت څخه یې د یوه پرېکړه لیک په اساس د یادو زده کوونکو د جذبولو غوښتنه وکړه.
وروسته د محصلانو چارو مرستیال ښاغلي مفتي احمد او مل پلاوي د یاد پرېکړه لیک د څرنګوالي په اړه سلا مشورې وکړې او د اخیرنۍ پرېکړه یې د معارف وزارت او د ازموینو ملي ادارې د استازو د نشتون له امله تر بلې ناستې وځنډوله.
د یادولو وړ ده چې د سرحدونو، قومونو او قبایلو چارو وزارت د لرې پرتو سیمو زده کوونکو ته د زده کړو زمینه برابروي او د هیواد د تعلیمي پراختیا په برخه کې فعاله ونډه لري.
