د وزارت اړوند تعليمي مرکزونو کې د اصلاحاتو له امله د ولسمشر لخوا استادانو، اداري کار کوونکو او ممتازو زده کوونکو ته د مکافاتو ورکول او د حب الوطن پروګرام پیلېدل!
په همدې پار د سرحدونو او قبایلو چارو وزارت اړوند د رحمان بابا لیسې د کنفرانسونو په تالار کې د دغه وزارت وزیر ښاغلي محمد شفیق ګل اغا شېرزي، د وزارت د معینانانو، رئیسانو، د ملي شورا د دواړو مجلسونو یو شمېر غړیو، د پوهنې وزارت د مرستیال ښاغلي ډاکتر محمد ابراهیم شینواري، د چارو اداري د تخنیکي معینیت د استازو، علمي او فرهنګي شخصیتونو، قومي مشرانو، درسنیو استازو او د اړوند لېسو د مسولینو، ښوونکو او زده کوونکو په ګډون نن سه شنبه د روان کال د لیندۍ پر۱۲ نېټه غونډه جوړه شوې ده.
د غونډې په پیل کې د سرحدونو او قبایلو چارو وزارت مسلکي معین ښاغلي ډاکتر فریدون بارکزي پخپله وینا کې د اړوند لېسو په تعلیمي نظام کې د پراخو اصلاحاتو یادونه وکړه وې ویل:چې د وزارت په اړوند لېسو کې د سرحدي او ناامنه سیمو ځوانان په زده کړو بوخت، چې وزارت یې د دوی لپاره په لیلیه توګه د زده کړو زمینه برابره کړې ده.په دې اړه یې د جلالتماب ولسمشر محمد اشرف غني له پاملرنې ،ملاتړ څخه ، چې له پوهنې سره یې لري مننه وکړه زیاته یې کړه، چې په تېرو پنځو کلونو کې د هېواد ولسمشر په بېلا بېلو مناسبتونو د اړوند لېسو له زده کوونکو سره کتلي او هغوی یې زده کړو ته هڅولي دي.همدا راز یې د اصلاحاتو په برخه کې د پوهنې له مرستیال ښاغلي ډاکتر محمد ابراهیم شینواري او د چارو اداري له تخنیکي معاونیت په خاصه توګه ښاغلی بشرمل له همکارۍ څخه مننه وکړه.
په یادو لېسو کې د حب الوطن پروګرام یو نوښت وبللو، وې ویل اصلاحاتو ته ژمن یو ، تعلیم د یوه هېواد ساتنه او دفاع ده، په رامنځته شویو اصلاحاتو بسنه نه کوو او دوام به ولري تر څنګ یې په نوي تعلیمي کال کې په خوست کې د قبایلو په نوم لیسې د فعالېدو خبر ورکړ.
ورپسې د سرحدونو او قبایلو چارو وزیر ښاغلي محمد شفیق ګل اغا شېرزي هم پخپلو خبرو کې د اصلاحاتو په دوام ټینګار وکړ وې ویل:چې دسرحدي او قبایلي سیمو ځوانانو ښوونې او روزنې ته ولسمشر ځانګړې پاملرنه لري چې مننه ورڅخه کوو. همدا راز یې د زونونو په کچه د ناامنه او سرحدي سیمو ځوانانو لپاره په لیلیه توګه د زده کړو د برابرولو د پروګرام د لرلو خبره وکړه او تر څنګ یې د ټاکنو له خپلواک کمیسیون څخه وغوښتل چې له هېچا ویره ونه لري او رڼې پایلې ژر تر ژره اعلان کړي.
د وزارت د تحقیق او مطالعاتو رئیس ښاغلي جاوید احمد وفا په دریو برخو کې د وزارت په اړوند لېسو کې د حب الوطن د تدریس په اړه خبرې وکړې وې ویل: موخه مو دا ده ، چې ځوانان په ملي او هېوادنۍ روحیه وروزل شي او په همدې روحیه په راتلونکي کې د دې هېواد او ولس د رښتینو خدمتګارانو او خادمانو په توګه د پرمختګ، پراختیا او ټولنیزې هوساینې لپاره په صداقت کار وکړي.
همدا راز د پوهنې وزارت مرستیال ښاغلي ډاکتر محمد ابراهیم شینواري ، په ولسي جرګه کې د خلکو استازو ښاغلیو نادر خان کټوازي ، اغلې وږمه ساپۍ، غلام ولي افغان ، د ښوونې او روزنې رئیس جمال الدین ذاهد پخپلو ویناوو کې دافغانستان د پرمختګ ، پراختیا او له ستونزو څخه د خلاصون لار د پوهې حاصلول وبلل، پوهې ته یې د ولسمشر او وزارت له پاملرنې مننه وکړه . په متوازن پرمختګ او دښوونې تر څنګ یې په روزنې ټینګار وکړ. او د حب الوطن تدریس یې له هېواد سره د مینې یو هڅونکی پروګرام یاد کړ او په دې برخه کې د هرراز مرستو او همکاریو ډاډ ورکړ.
د غونډې په پای کې داصلاحاتو له امله د ولسمشر لخوا استادانو، اداري کارکوونکو او ممتازو زده کوونکو ته په پام کې نېول شوی مکافات ورکړل شول او همدا راز د سرحدونو او قبایلو چارو وزیر ښاغلي محمد شفیق ګل اغا شېرزي، مسلکي معین ښاغلي ډاکتر فریدون بارکزي ته د ویاړ پګړۍ ور وتړله او ښاغلی شیرزی، مسلکی معین، د تحقيق او مطالعاتو ريس ښاغلي جاويد احمد وفا او نورو ته د ولسي جرګې لخوا تقدیر نامې او د اړوند لېسو په استازیتوب درحمان بابا دلیسی امر ښاغلی محمد عمر معصومی خبری وکړی او داصلاحاتو د پروسی په لړ کی د وزارت
مشرتابه څخه مننه وکړه او مشرتابه، قومي مشرانو او میلمنو ته ترتیب شوي ډالۍ ورکړل شوې.
