د خوست او زابل دوه کورنيو ترمنخ مرګوني شخړه په پخلاينه بدله شوه
يکشنبه ۲۱ ربيع الآخر ۱۴۴۸
د خوست ولایت نادرشاه کوټ او زابل ولایت مرکز دوه کورنیو ترمنځ د څه مودې راهيسې روانه شخړه، چې د یو کس د وژل کیدو سبب ګرځیدلي وه د خوست د سرحدونو، قومونو او قبایلو چارو ریاست د مسؤلينو، ولسوالي استازو او زابل ولایت ديني عالمانو، قومي مشران او متنفذينو په منځګړیتوب د یوې قومي جرګې په ترڅ کې پای ته ورسېده.
دغه دوه کورنۍ، چې له يوې مودې راهیسې یې ترمنځ سخت اختلافات موجود وو او د ځاني تلفاتو تر څنګ مالي زیانونه هم ورته اوښتي وو تېره ورځ د یادو شویو مسؤلينو او مشرانو په منځګړیتوب پخلاینې ته راضي شول او د جرګه کوونکو له لارښوونو وروسته یې سولې او ورورولي ته غاړه کېښوده.
د پخلاينې یاد مراسم، چې د خوست نادرشاه کوټ ولسوالي په ملنګي کلي کې نیول شوي وو پرمهال يې د ښکېلو کورنيو مشرانو د مسؤلينو له لخوا د ترسره شویو هڅو ستاینه وکړه او د هغوی له لوري په شوې فیصله یې خوښي څرګنده کړه.
