لغمان کې د دوه کلنې شخړې ترڅنګ کنړ کې هم شخړه هواره شوه
يکشنبه ۲۸ ذوالحجة الحرام ۱۴۴۷
د لغمان ولايت د سرحدونو، قومونو او قبايلو چارو رياست رئيس د قومي مشرانو په همغږۍ د دغه ولايت په مرکز کې د څو تنو هېواد والو ترمنځ د ځينو مالي حسابونو پر سر را پورته شوې هغه شخړه هواره کړه، چې په پايله کې يې يوکس ټپي شوی و او ګڼې ستونزې يې ترشا لرلې.
ياده شخړه، چې د تېرو دوو کلونو راهېسې روانه وه څوڅو ځله پکې د دواړو خواوو ترمنځ د سپکو وسلو نښتې هم رامنځته شوې وې، چې له کبله يې لوی جنجالونه پېښ کړي وو او د دواړو خواوو ژوند يې نا ارامه کړی و.
په ورته مهال د کنړ ولايت په سرکاڼو ولسوالي کې د دوو کورنيو ترمنځ د ځينو حقوقي مسائلو پر سر راپورته شوې شخړه، چې له امله يې يوکس ټپي شوی و د ياد ولايت د سرحدونو، قومونو او قبايلو چارو رياست د استازو له لوري حل شوه او طرفينو د سولې غاړې ورکړې.
