سرحدي او ډېورند فرضي کرښې ته د څېرمه ولسواليو د خلکو ستونزو ته د رسيدنې په موخه مرکزي کمېټې ناسته وکړه
یکشنبه ١٧/۴/۱۴۴۶
د اميرالمؤمنين حفظه الله تعالی د حکم پر اساس چې د سرحدونو، قومونو او قبايلو چارو وزارت ته دنده سپارل شوې وه تر څو سرحدي او ډېورنډ فرضي کرښې ته د څېرمه ولسونو اولویه ستونزې واورې او د حل په موخه یې راپور د امیرالمؤمنین حفظه الله تعالی له مقام سره شریک کړي.
د همدې حکم پر اساس د سرحدونو، قومونو او قبایلو چارو د وزیر الحاج ملا نورالله نوري په مشرۍ په نورستان، کنړ، ننګرهار، خوست، پکتیا او پکتیکا ولایتونو کې د ولایتي کمېټو تر جوړېدو وروسته د سرحدونو، قومونو او قبایلو چارو وزارت په کچه د یاد وزارت د سرحدي څېړنې د مرستیال الحاج مولوي محمد اسماعیل غزنوي په مشري یوه مرکزي کمېټه جوړه شوه، تر څو د سرحدي او ډېورنډ فرضي کرښې ته د څېرمه ولسوالیو را ټولې شوې ستونزې و ارزوي او د حل لارې چارې ورته ولټوي.
مرکزي کمېټې نن د سرحدي پلټنې د مرستیال الحاج مولوي محمد اسماعیل غزنوي په مشرۍ ناسته ترسره کړه چې پر مهال یې د کمېټو اعضاوو هم شتون درلود، په ناسته کې د یادو ولسوالیو د خلکو ستونزو ته د رسېدنې په موخه د مالي لګښتونو او چارو د ښه تنظیم او سر ته رسولو په موخه د طرزالعمل، مالي سند او مکانزمونو په اړه بحث وشو او د غونډې په ترڅ کې ددې طرزالعمل او مکانزمونو د تشریح او توضیح لپاره د ولایتي کمېټو د عامه پوهاوي لپاره یو هیئت وټاکل شو.
د ناستې په جریان کې په دې اړه هم خبرې وشوې چې په لنډ وخت کې به ډېورنډ فرضي کرښې ته د څېرمه یو لړ ولايتونو لپاره د ځانګړې شوې بودجې څخه په ځینو ولایتونو کې د سرکونو د رغونې، روغتیا، اوبو او انرژي، مخابراتو، ښوونې او روزنې په برخه کې ځینې کارونه پیل شي.
