په لغمان، بلخ او کاپيسا ولايتونو کې بيلابيلې کورنۍ د ورورولۍ پر ټغر را ټولې شوې
دوشنبه ۴/۶/۱۴۰۳
د لغمان ولايت مرکز اړوند سه صده سيمه کې د دوو کورنيو ترمنځ هغه یو کلنه شخړه هواره شوه چې، له امله يې يو کس وژل شوی و او څلور نور پکې ټپيان وو. د سرحدونو، قومونو او قبايلو چارو آمريت مسؤلينو، مشرانو او قومي سپين ږيرو دغه کورنۍ لومړی خبرو ته اماده کړه او بيايې د دوی تر مابین د روغه جوړه وکړه.
په همدې مناسبت په جوړه شوې غونډه کې حکومتي مسؤلینو، علماوو او قومي مشرانو ګډون درلود، دوی د خپلو خبرو پر مهال شخړې او دوښمنۍ غير اسلامي کړنې وبللې او خلک يې يووالي، ورور ولۍ، صميميت اوسولې ته را وبلل.
ددې تر څنګ د بلخ ولايت د سرحدونو، قومونو او قبايلو چارو رياست په هلو ځلو په دولت اباد ولسوالۍ کې د يو لړ اختلافاتو له امله دوې جلا شوې کورنۍ بيرته سره يوځاي شوې، د دغه ولايت د شخړو د حل کمېټې مسؤلينو، مصلحينو، د ا.ا.ا استازو او ځايي خلکو په ګډو همکاريو ياده شخړه له منځه يووړه او دواړه جلا شوې کورنۍ بيرته سولييز ژوند ته راوګرځيدې.
په ورته مهال د کاپيسا او سمنګان ولايتونو د اوسيدونکو ترمنځ د ترافيکي پيښې له امله رامنځته شوې ستونزه حل شوه، په دغه حادثه کې چې د کاپيسا ولايت نجراب ولسوالۍ يو اوسيدونکی پکې وژل شوی و د ياد ولايت د سرحدونو، قومونو او قبايلو چارو آمريت په هڅو د علماوو، سپين ږيرو او مشرانوپه همکارۍ په روغه جوړه بدله شوه، د وژل شوي کس کورنۍ مقابل لوری وباښه او سره غاړه غړۍ شول،
د یادونې وړ ده چې په تېرو څو ورځو کې په ننکرهار، کنړ، بلخ،روزګان او سمنګان ولایتونو کې هم دې ته ورته شخړې هوارې شوې دي.
