تاسې لوړ کادرونه او د ملت سترګې یاست
دوشنبه/۳۰/ذالقعدةالحرام/۱۴۴۴
د سرحدونو،قومونو او قبایلو چارو وزارت اړوند د دعوت او ارشاد رئیس الحاج مفتي شفیع الله ثاقب د یوه هیئت په مشرۍ چې د یاد وزارت د کوچیانو د اقتصادي پروګرامونو او څړځایونو رئیس مفتي لعل محمد منیب او نور کارکوونکي هم پکې شامل وو، په یاد وزارت پورې اړوند د پیر محمد کاکړ عالي لیسې له زده کوونکو او تدریسي پرسونل سره ناسته وکړه.
په پیل کې د یاد وزارت د دعوت او ارشاد رئیس ښاغلي مفتي ثاقب زده کوونکو ته په خطاب کې وویل: تاسې د دې هیواد راتلونکې یاست، که د هر مسلک خاوندان کېږئ کوښښ وکړئ د ټولنې یوه اړتیا پوره کړئ نه دا چې د ټولنې د اوږو بار شئ، که عصري علوم موږ له جهان سره سیال کوي او د وخت اړتیا ده دیني علم د دنیا او آخرت څراغ دی چې په واسطه به یې لومړی ځان او بیا الله (ج) پېژنو. نوموړي همدا راز وویل: تاسې لوړ کادرونه او د ملت سترګې یاست، ترشا مو یو اسلامي نظام ولاړ دی، استاد مو پالنه کوي، تعمیرونه درته ودان شوي، د وړیا زده کړو زمینه درته مساعده ده، د هیواد، ملت، مور اوپلار نوم مو روښان کړئ، سنګر، محراب او عقیده وساتل شوو، اوس تاسې ته لازمه ده چې د خپلو علمي زده کړو په واسطه د ملت د راپورته کېدلو او دفاع لپاره کار وکړئ.
ښاغلي ثاقب د یادې ناستې موخه نبوي صورت او سیرت ته د زده کوونکو د پام را اړول یاد کړل او له زده کوونکو او تدریسي کارکوونکو یې وغوښتل چې خپل اخلاق، کړه وړه او رفتار دي د نبوي سیرت په مسیر برابر کړي تر څو په دنیا او آخرت کې نیکمرغه و اوسي.
ورپسې د کوچیانو د اقتصادي برنامو او څړځایونو رئیس ښاغلي منیب خبري وکړې، زده کوونکې یې خپلو درسونو ته و هڅول او د معلم د مقام په اړه یې وویل: استادان د ټولنې هغه قشر دی چې د هیواد ټول په کار پوه خلک دوی روزلي دي، موږ ۴۰ کاله تر فکري او نظامي یرغل لاندې وو اوس مو له ښوونکو څخه هیله ده چې د زده کوونکو په فکري رغوونه کې خپل مسؤلیت په ښه توګه ادا کړي.
د یادې لېسې د استادانو په استازیتوب یوه تن معلم مولوي حیات الله د راغلي پلاوي له ورتګ څخه مننه وکړه، د زده کوونکو سالمه روزنه یې خپل مسؤلیت یاد کړ او ویې ویل: په قرآنکریم کې د الله (ج) فرمایي٬٬هریو له تاسي څخه د شپون دی چې د خپل رعیت مسؤلیت پرغاړه لري٬٬ نو موږ تاسې ته ډاډ درکوو چې د زده کوونکو په پالنه او روزنه کې به خپل ایماني مسؤلیت په ښه ډول سرته رسوو.
د غونډې په پای کې ۳۶ ټوکه قرانکریمونه او چاپ شوې مسنونې دوعاګاني لېسې ته د تخفې په ډول ورکول شول.
د یادولو وړ ده چې د غونډې په اخیر کې د یادې لېسې له ښوونکو سره په جلا ناسته کې د هغوی ستونزې واورېدل شوې او د حل په موخه یې دوی ته ډاډ ورکول شو.
