په بامیان ولایت کې د لنډ مهاله سرویرانو د ګمارنې لپاره تحريري آزموينه واخيستل شوه!
د سرحدونو او قبايلو چارو وزارت په چوکاټ کې د "سرحدونو او اطلاعاتو مدیریت پروژې" په بامیان ولايت کې د روان کال د چنګاښ مياشتې پر ۱۳ مه نېټه د یاد ولایت د سرحدونو او قبايلو چارو آمریت په مرسته د لنډ مهاله سرویرانو د ګمارلو لپاره تحريري آزموينه واخیستل شوه.
له آزموینې مخکې د بامیانو ولايت د سرحدونو او قبایلو چارو آمر اسحاق پویا ګډونوالو ته د ازموینې د شفافیت او د دې پروژې او څېړنو د اهميت په اړه لنډې خبرې وکړې.
ورپسې د یادې پروژې د مالوماتو راټولو افسرانو ښاغلي خېبر امیري او ښاغلي سید محمود سادات د پروژې په اهميت او د آزموينې د څرنګوالي په اړه له ګډونوالو سره خپل مالومات شريک کړل او د شفافیت ډاډ یې ورکړ.
د یادونې وړ ده، چې تحريري آزموينې لپاره د بامیان ولايت د مرکز په ګډون د ۸ ولسوالیو، لنډ مهاله سرويرانو د استخدام لپاره ۲۳۰ تنو د آزموينې فورمې ډکې کړې وې، چې ۷۲ تنه د تحريري آزموينې لپاره شارټ لیست شوي وو، او په پوره شفافيت سره د ازموينې د کمېټې او له کابل څخه د تللي پلاوې په موجوديت کې له ټولو ګډون کوونکو څخه تحريري آزموينه واخېستل شوه.
