د ولسمشر له سلاکارانو، قومي مشرانو، سناتورانو، دیني عالمانو مخورو او ځوانانو سره کتنه!
په دې کتنه کې راغلو مشرانو د حل په موخه د خپلو سیمه ییزو ستونزو شریکولو په ترڅ کې د وزارت له مشرتابه او د ملي یووالي حکومت له مشرانو څخه هیله وکړه، چې د شهید عبیدالله بارکزي زوی ښاغلي حاجي حضرت شاه بارکزي ته دې مناسبه دنده ورکړل شي، ترڅو د خپل شهید پلار تشه ډکه کړي همدا راز د ولسمشر سره دې د لیدو لپاره زمینه برابره شي.
ورپسې د سرحدونو او قبایلو چارو وزیر ښاغلي محمد شفیق ګل آغا شېرزي په خپلو خبرو کې د یادو مشرانو ستونزې پر ځای وبللې او د دوی له ملي احساس څخه یې د مننې په ترڅ کې وویل: ستاسو درنو مشرانو ستونزو ته د حل لارې چارې پیدا کول زموږ مسؤلیت دی موږ کوښښ کوو، چې ستاسو ستونزې له ولسمشر سره د حل په موخه ملاقات جوړ او ورته په ګډه د حل لارې چارې پیدا کړو.
همدا راز ښاغلي محمد شفیق ګل آغا شېرزي زیاته کړه د دې لپاره، چې شهید عبید الله بارکزي د خپل هېواد او خلکو لپاره بې ساري خدمتونه ترسره کړي دي نو موږ به هم د ارواښاد د زوی ښاغلي حضرت شاه بارکزي لپاره له ولسمشر څخه د یوې مناسبې دندې هیله وکړو.
ترڅنګ یې ښاغلي حضرت شاه بارکزي ته د عزت پګړې ورپه سر کړه.
