سرپل کې د ۱۵ کلنې بدي سربېره پکتيا کې هم درې کلنه شخړه حل او فصل شوه
سه شنبه ۳۰ ذوالحجة الحرام ۱۴۴۷
د سرپل ولايت په سيدآباد ولسوالۍ کې د دوو کورنيو ترمنځ د ځمکې د ملکيت پر سر را پورته شوې پنځلس کلنه بدي، چې له کبله يې ګڼې ستونزې را ولاړې شوې وې د ياد ولايت د سرحدونو، قومونو او قبايلو چارو رياست د مسؤلينو، قومي مشرانو، ديني عالمانو او ځايي خلکو په همکاري حل او فصل شوه.
همدا راز د پکتيا ولايت د سرحدونو، قومونو او قبايلو چارو رياست استازو د خپلو دوامدارو هڅو په پايله کې د دغه ولايت په ځاځي اريوب ولسوالۍ کې د دوو کورنيو ترمنځ د ځينو خپلمنځي مسائلو پر سر راپورته شوې درې کلنه شخړه په سوله ييز ډول هواره کړه.
د دغې رامنځته شوې شخړې په پايله کې له يوه لوري څخه يوتن وژل شوی و او د لويو مالي تاوانونو ترڅنګ يې د غچ اخېستلو ګواښونه ترمنځ موجود وو، چې بلآخره مسؤلينو په خپل منځګړيتوب سره د پای ټکی ورته کېښود.
