لغمان کې د ۴۰ کلنې بدي ترڅنګ جوزجان کې ۱۵ کلنه او پروان کې ۸ کلنه شخړه حل شوه
سه شنبه ۲۵ جمادی الآخرة ۱۴۴۷
د لغمان ولايت د سرحدونو، قومونو او قبايلو چارو آمريت آمر مولوی نورالهادي چپاو په مشري د قومي مشرانو، ديني عالمانو او ځايې خلکو په منځګړيتوب د دوو کورنيو ترمنځ د شاووخوا څلورو لسيزو دوامداره بدي په دوستي بدله شوه.
دغه اوږدمهاله بدي، چې د ياد وولايت په الينګار ولسوالي کې د دوو کورنيو ترمنځ د مېرمنو پر سر راپورته شوې وه او درې تنه پکې ټپيان شوي هم وو د مسؤلينو د دوامداره هڅو په پايله کې په دوستي بدله، ښکېلو لوريو يوبل ته بښنه وکړه او د دورورولي ژوند يې پيل کړ.
په ورته مهال د جوزجان ولايت د سرحدونو، قومونو او قبايلو چارو رياست مسؤلينو له خوا د ځايي قومي مشرانو او علماوو په ملتيا د دغه ولايت په مرکز شبرغان کې د تېرو شاووخوا پنځلس کلونو لويه شخړه، چې د ځينو ځمکو او څړځايونو د ملکيت پر سر راپورته شوې وه او لوی مخالفتونه يې رامنځته کړي وو مسؤلينو په خپل منځګړيتوب د څو ناستو په ترڅ کې پای ته ورسول او طرفينو د سولې غاړې سره ورکړې.
د دې ترڅنګ د پروان ولايت د سرحدونو، قومونو او قبايلو چارو رياست مسؤلينو د ولایتي ادارې استازو، قومي مشرانو او ديني عالمانو په هڅو د د دوو کورنیو ترمنځ شاوخوا هغه اته کلنه شخړه هواره کړه، چې د ځمکو د ملکيت پر سر راپورته شوې وه
