په هيواد کې د مسؤلينو او ولسي خلکو ترمنځ د يووالي او هوساينې د غونډو دوام
سه شنبه ۶ جمادی الأولی ۱۴۴۷
د سرحدونو، قومونو او قبایلو چارو وزارت له لوري په خوست ولايت کې له خلکو سره د ياد وزارت د جرګو او قبایلو چارو د همغږۍ د معین په مشري د مل پلاوي په شتون کې د ملت اتحاد، اسلامي نظام بقاء او ولس هوساینې تر عنوان لاندې ولسي غونده وشوه، چې پر مهال یې د ولایتي ادارو مسؤلینو او ولسواليو استازو په ګډون، قومي مشرانو، ديني عالمانو، سپین ږیرو او ځوانانو هم برخه لرله.
د غونډې پرمهال قومي مشرانو وويل: د تېرو حکومتونو پرمهال ولس شيندلی و، ترمنځ يې لويې تفرقې موجودې وې خو د ا.ا.ا په راتګ سره الحمدلله دا هرڅه له منځه تللي. قومي مشرانو زياته کړه: اسلامي نظام د یووالي، ورورولۍ او نېکمرغۍ رڼا خپره کړه او د بدبختۍ لمن یې ټوله کړه. دوی همداراز خوښي څرګنده کړه، چې د مسؤلینو د مخلصو هڅو او ژمن کار له برکته د ولسونو ډېری بدۍ او ستونزې حل او فصل شوې دي.
ورپسې د جرګو او قبايلي چارو د همغږۍ معین ښاغلي احمد وویل چې په هيواد مو نظامي یرغل په دې موخه وشو، چې ترڅو زموږ د ایمان او عقیدې مفکوره له منځه یوسي او شیطاني نظریات خپاره کړي. هغه ټینګار وکړ چې که موږ او تاسو په یو هدف، یو فکر او یوه نظریه یوځای ووسو، هېڅ ځواک به ونه توانیږي زموږ اراده او وحدت مات کړي. نوموړي د خوست خلکو ته ډاډ ورکړ، چې اسلامي امارت مو ترڅنګ ولاړ دی او د نظام لپاره ترسره شوې قربانۍ به مو تل په ياد ولري.
په پای کې د خوست والي مولوي محبوب شاه قانت او دوزارت د څړځایونو او خدمتونو د اقتصادي چارو رئیس مفتي لعل محمد منیب د امیرالمؤمنین حفظه الله د انساني قاچاق د مخنيوي فرمان د لوستلو پر مهال وويل: انسان د خرڅلاو وړ نه دی او دا ډول ناروا کړنې نه یوازې د بشري حقونو ښکاره سرغړونه ده، بلکې د ټولنې د تباهۍ او اخلاقي زوال سبب هم ګرځي. دوی زياته کړه، چې دودونه او رواجونه باید د اسلامي شریعت له اصولو سره سم وي، څو راتلونکی نسل د اسلامي ارزښتونو پر بنسټ وروزل شي.
