ميدان وردګ ولايت کې دوه کلنې شخړې پای وموند
پنجشنبه ۲۶/شوال /۱۴۴۶
د ميدان وردګ ولايت د سرحدونو، قومونو او قبايلو چارو آمر امين الله اخندزاده په مشري د ځايې خلکو، متنفذينو او علماوو په ګډو هڅو د ياد ولايت په جلريز ولسوالۍ کې د علي او قزلباش خيلونو ترمنځ دوه کلنه شخړه حل او فصل شوه.
د دغې شخړې پرمهال دواړو خواوو يو بل ته د هستوګنې کورونه سوځولي وو او د سختو مالي تاوانونو ترڅنګ يې له يو بل سره ژور جنجالونه درلودل، چې د مصلحينو لخوا يې لومړی موضوع وڅيړل شوه او بيا د شريعت په رڼا کې له فيصلې وروسته سره پخلا شول.
د جرګې مشرانو زیانمن شوي لوري وپوهول، چې په شخړو او جنګونو کې هېڅ خير نشته بلکې ډير نور تاوانونه هم پېښولی شې همدا راز ښکېلو خواوو هم د محلي مسؤلینو په ځانګړې توګه د سرحدونو، قومونو او قبایلو چارو آمريت له مسؤلینو مننه وکړه او د موضوع پر حل یې خوښي څرګنده کړه.
