د بایزید روښان کثیرالرشتوي انستیتیوت کانکور ازموینه واخیستل شوه
د بایزید روښان کثیرالرشتوي انستیتیوت کانکور ازموینه واخیستل شوه
شنبه ۱۴۴۶/رمضان المبارک/۱۵
د سرحدونو، قومونو او قبایلو چارو وزارت اړوند بایزید روښان کثیرالرشتوي انستیتیوت ته د سرحدي او لرې پرتو سیمو د دوولسمو ټولګيو فارغانو د جذب کانکور ازموینه نن ورځ د تخنیکي او مسلکي زده کړو او د سرحدونو، قومونو او قبایلو چارو وزارت د هیئتانو په حضور کې واخیستل شوه.
په دغه ازموینه کې د ۴۹۰ تنو ګډونوالو له جملې ۴۴۰ تنو فارغانو په ازموینه کې برخه اخیستې وه، چې د خپل استعداد او ترلاسه کړیو نمرو په اساس به (۳۰۰) تنه د یاد انستیتیوت انجنیري، کمپیوتر ساینس، اقتصاد او کرنې پوهنځیو ته بریالي ور وپېژندل شي او پایلې به یې تر راتلونکو دوو ورځو پورې د وزارت له ویب پاڼې او نورو رسمي ادرسونو څخه نشر شي.
د یادونې وړ ده، چې د سرحدونو، قومونو او قبایلو چارو وزارت همېشنۍ هڅه او کوښښ همدا دی، چې د هیواد د لرې پرتو او سرحدي سیمو زده کوونکو او زده کړیالانو ته د زده کړي سالم چاپیریال رامنځته کړي او د خپلو ښوونیزو مرکزونو له لوري د دوی سالمه ښوونه او روزنه وکړي.
