په زابل ولایت کې د شاوخوا یوې لسیزې شخړه حل شوه
چهارشنبه١٠/۱۲/ ۱۴۰۳
د زابل ولایت د میزانې ولسوالۍ د مریاڼو په سیمه کې د دوو قومونو ترمنځ د قتل پر سر د شاوخوا یوې لسیزې پېښه شوې شخړه د یاد ولایت د والي الحاج مولوي حزب الله افغان، د سرحدونو قومونو او قبایلو چارو ریاست رئیس الحاج مولوي محمد کریم سحر اخندزاده، مرستیال والي مولوي محب الله حماس، ځایي مسؤلینو، قومي مشرانو او مصلحینو په ګډه هڅو او منځګړیتوب حل او په دوستۍ بدله شوه.
په لومړي سر کې یادو مسئولینو او قومي مشرانو له ښکېلو لورو اختیار لیکونه واخیستل او د پېښې د اصلي لامل په اړه یې څېړنې وکړې. د دې څېړنو په پایله کې د قضیې د حل لپاره فیصله ابلاغ کړه او دواړه لوري یې د یووالي پر لور را وبلل او پېښه شوې شخړه یې په دوستۍ بدله کړه.
په پای کې ښکېلو غاړو ابلاغ شوې فیصله ومنله او یو بل ته يې غاړه ورکړه او د ټولو منځګړو په حضور کې یې ډاډ څرګند کړ چې په راتلونکي کې به په خپلو منځونو کې یو بل ته ستونزې او خنډونه نه جوړوي.
