له نقشبندیه سیف الاحناف مدرسې څخه لسګونه فاضلان او قاریان فارغ شول
دوشنبه ۱۴۴۶/۶/۱٥
د سرحدونو، قومونو او قبایلو چارو وزیر الحاج ملا نورالله نوري زابل ولایت ته د خپل سفر په اوږدو کې د دغه ولایت شاجوی ولسوالۍ د هولان رباط سیمې د نقشبندیه سیف الاحناف مدرسې د فاضلانو او قاریانو په فراغت غونډه کې ګډون وکړ.
د دغې فراغت غونډې پر مهال ښاغلي نوري فارغ شویو فاضلانو او قاريانو ته د مبارکۍ ترڅنګ د علم په فضیلت او د علماوو په ارزښت او شان خبرې وکړې. هغه زیاته کړه: علم د لارې مشال او له تیارو څخه د راوتلو وسیله ده که چیرته عمل ورسره یوځای شي د دواړو جهانونو د سعادت او نېکمرغۍ سبب ګرځي. نوموړي د مدرسې په تاریخي مخینه او اهمیت رڼا واچوله او له فارغ شویو فاضلانو څخه یې غوښتنه وکړه ترڅو له خپل علم څخه په ګټنې خپل ولس ته د خدمت جوګه وګرځي.
په یاده غونډه کې د شاجوی ولسوالۍ دولتي مسؤلینو، او سیمه ییزو عالمانو هم فارغ شوي فاضلان او قاریان خپلو مسؤلیتونو ته متوجه کړل او د پوهي په ارزښت یې علمي ویناوې وکړې. له یادې مدرسې څخه د دغې فراغت غونډې په ترڅ کې ۲۰ تنه د لویې دورې فاضلان او ۳۲ تنه قاریان فارغ شول او د فضیلت پګړۍ ور په سر کړل شوې.
