په ارزګان ولایت کې له قومونو سره د همغږۍ غونډه
١١/٨/١٤٤٥ ھ ق
د سرحدونو، قومونو او قبایلو چارو وزارت په ارزګان ولایت کې د همغږۍ تر سرلیک لاندې ستره غونډه جوړه کړه چې پر مهال یې د وزارت د جرګو او قبایلو چارو د همغږۍ رئیس شیخ حضرت ولي حقاني، د پلان او پالیسي رئیس مولوي نیک محمد افغاني، ځايي مسؤلینو، قومي مشرانو، دیني عالمانو او ولسي خلکو ګډون کړی وو.
په غونډه کې قومي مشرانو د اسلامي نظام څخه خوښي څرګنده کړه او د یاد وزارت د مسؤلینو هلې ځلې یې وستایلې. دوی زیاته کړه چې دغه وزارت له قومونو سره د یووالي په پار ناستې کوي، د قومونو تر منځ شخړې حل کوي او د همغږي رامنځته کولو په موخه چټک ګامونه اخلي.
قومي مشرانو په یاد ولایت کې د برېښنا نه شتون، د سړکونو، پلچکونو او بندونو رغول خپلې ستونزې یادې کړې او له حکومت څخه یې د حل غوښتنه وکړه.
په پای کې د جرګو او قبایلو چارو د همغږۍ رئیس شیخ حضرت ولي حقاني وویل چې الحمد لله په هیواد کې اسلامي نظام قائم دی، خو پالل او ساتل د ټول افغان ملت وجیبه ده. ښاغلي حقاني د اختلافاتو بدو پایلو ته اشاره وکړه ویې ویل: د اختلاف له امله د سمرقند او بخارا په شان علمي مرکزونه هم له خاورو سره خاورې شول. نوموړي قومي مشرانو ته ډاډ ورکړ چې ستونزو ته به یې د حل لارې چارې لټوي.
