په جوزجان ولایت کې اته کلنه شخړه حل شوه
۲۶\۶\۱۴۴۵
د جوزجان ولایت په مرکز شبرغان کې د سرحدونو، قومونو او قبایلو چارو ریاست د هلو ځلو د قومي مشرانو، ځایي چارواکو، او دیني علماوو د همکارۍ په پایله کې اته کلنه شخړه حل شوه.
په دغه غونډه کې چې د همدردۍ په موخه جوړه شوې وه، د یاد ریاست رئیس مولوي غلام نبي صميم، د رياستونو مسؤلينو، ديني عالمانو او د ياد ولايت قومي مخورو هم حضور درلود.
یاده شخړه چې د یوې کورنۍ د غړي د وژلو له امله را منځته شوې وه، او پرلپسې اته کاله یې دوام کړی وو.
ښاغلي صمیم د اسلام د سپیڅلي دین له نظره د بښنې پر اهمیت خبرې وکړې، په جګړې کې ښکېلې کورنۍ یې د دوستۍ او پخلاینې لور ته را وبلل، چې په نتیجه کې دواړو لورو یو له بل سره غېږې ورکړې او سوله یې وکړه.
د دواړو غاړو مشرانو د دې شخړې د حل کولو په برخه کې د سرحدونو، قومونو او قبايلو چارو رياست له هلو ځلو مننه او قدرداني وکړه.
