د پولو ساتونکو يو ساعت څارنه د حجرالأسود تر خوا د تهجد تر لمانځه زيات اجر لري. (نوري)
۱۸/رجب المرجب
يادې خبرې د سرحدونو قومونو او قبایلو چارو سرپرست وزير الحاج ملا نورالله نوري هرات ولايت ته د رسمي سفر په ترڅ کې د اسلام قلعه بندر د ليدنې پر مهال سرحدي ځواکونو او نورو مسؤلينو ته وکړې. ښاغلي نوري له اسلام قلعه بندر څخه د کتنې پر مهال چې د هرات ولايت د سرحدونو قومونو او قبایلو چارو رئيس مولوي جمالدين عمري او ځينې نور مسؤلين هم ورسره مل وو د ياد بندر له کميسار ښاغلي زعيم اغا او سرحدي ځواکونو سره وکتل او د مسافرو د تګ راتګ د اسانتياو، ايراني لوري سره د همغږۍ او له دې لارې د تجارتي مالونو د صدور او ورود په اړه يې اطمينان ترلاسه کړ او مسؤلينو ته يې د چارو د لا ښه والي لپاره ځينې اړينې سپارښتنې وکړې. ښاغلي نوري سرحدي ځواکونو ته په خبرو کې وويل چې تاسو د پوله ساتونکي يوه سپيڅلې او ستړې دنده پر مخ وړئ او مسؤليت مو خورا دروند دی، د پولو ساتونکو يو ساعت څارنه د حجرالأسود تر خوا د تهجد تر لمانځه زيات اجر لري. د سرحدونو قومونو او قبایلو چارو سرپرست وزير ښاغلي نوري له ايران سره د ګډې پولې او سرحدي نښو څخه هم ليدنه وکړه.
