د کندهار ولایت له مرستیال والي سره کتنه
يکشنبه، ٧ رجب المرجب١٤٤٤
د سرحدونو، قومونو او قبایلو چارو وزارت د جرګو او قبایلي چارو د همغږۍ معین الحاج ملا عبدالخالق عابد په مشرۍ مل پلاوی چې یو شمېر ولایتونو ته د قومونو تر منځ د یووالي او همغږي غونډو جوړولو په پار تللی دی، نن یې د دغه سفر په ترڅ کې د کندهار ولایت له مرستیال والي حیات الله سره د ولایت په مقام کې وکتل.
په دې کتنه کې مرستیال والي د پلاوي مشر الحاج ملا عبدالخالق عابد او ورسره ملګري پلاوي ته ښه راغلاست ووایه او د کندهار ولایت د مېشتو قومونو په اړه یې هر اړخیز معلومات ورکړل، ویې ویل چې دلته میشت قومونه په خپلو سیمو کې د امن په ساتلو کې همکار دي او له خپل اسلامي نظام څخه ملاتړ کوي.
ورپسې ښاغلي الحاج ملا عبدالخالق عابد په خپلو خبرو کې قومونو ته د خدمت په لار کې په همغږۍ ټینګار وکړ او زیاته یې کړه چې موږ د نورو ولایتونو په څېر په کندهار کې هم د دیني عالمانو او قومي مشرانو په ګډون د یوې غونډې د جوړولو پلان لرو، تر څو له نږدې د خلکو ستونزې او غوښتنې واورو او تر منځ یې د یووالي او ورور ولۍ د ټینګښت لپاره کار وکړو. چې د کندهار مرستیال والي په دې اړه د همکارۍ ډاډ ورکړ.
