د روغتیا او ماینونو د خطرونو په اړه د عامه پوهاوي ورکشاپ تر سره شو.
يکشنبه ١ جمادى الثاني١٤٤٤
په لوګر ولایت کې له جینيوا کال موسیسې سره د سرحدونو، قومونو او قبایلو ریاست د تړون په اساس نن د دغه ولایت د ځایي کوچیانو نارینوو د ماینونو د خطرونو او ښځینه کوچیانو ته د روغتیا په برخه کې د عامه پوهاوي ورکشاپ تر سره شو.
په یاد ورکشاپ کې د جینيوا موسیسې کارکوونکو، د لوګر د سرحدونو، قومونو او قبایلو چارو ریاست د کوچیانو د انسجام مدیر او یو شمیر نارینه او ښځینه کوچیانو په دوه بېلابېلو ورکشاپونو کې ګډون کړی وو.
دجینيوا موسیسې د ښځینه کارکونکو له لوري یادو ښځینه ګډون والو ته د لومړنیو روغتیایي خدمتونو په اړه معلومات وړاندې شول، چې څنګه کولای شي د اړتیا پر مهال له بلې خور سره لومړنۍ مرستي وکړي.
او همدارنگه نارینه کوچیانو ته د ماینونو د خطرونو او ډولونو په اړه معلومات وړاندې شول او له هغوي وغوښتل شول چې خپل کلیوال، نور افراد او ماشومان دې په پوه کړي چې په نامعلومو او خطرناکو لارو له تګ کولو څخه ډډه وکړي په ناچادو موادو لاس ونه وهي او په اړه یې اړونده ادارو ته خبر ور کړي او خپل معلومات له خپلو دوستانو او اولادونو سره شریک کړي.
