د سرحدونو قومونو او قبایلو چارو وزارت له لوري په کنړ ولایت کې ستره قومي جرګه جوړه شوه.
۱۴۴۴/۵/۱۴ پنجشنبه
په یاده جرګه کې د سرحدونو قومونو او قبایلو چارو وزارت سرپرست وزیر الحاج ملانورالله نوري او مل پلاوي ګډون درلود د کنړ ولايت والي مولوی احمد طه قادري، ولايتي مسؤلينو او د ټولو ولسواليو څخه راغلو سلګونو قومي مشرانو پکې برخه اخيستې وه.
د غونډې پر مهال د سرحدونو ق.ق چارو سرپرست الحاج ملانوري نوري وویل: د کنړ ولس د اشغالګرو په وړاندې جهاد او مبارزې ځانګړی مقام لري، د جهاد پر مهال ټولې هغه سيمې له پرمختګ څخه پاتې او محرومې وې چيرته چي به مجاهدين اوسېدل؛ اسلامي امارت متوازن انکشاف او پراختيا ته ژمن دی او لومړيتوب ليري پرتو او محرومو سېمو ته ورکوي، نوموړي همدا راز زياته کړه د سرحدونو، قومونو او قبایلو چارو وزارت د ولس غږ ته انعکاس ورکوي او د خلکو واقعي ستونزو ته حل لټول خپله دنده بولي.
ورپسې د ولسوالیو او د مرکز د ولس په نمایندګي ښاغلي باچا او مولوي محمد طاهر وویل: په کنړ ولایت کې د قومونو تر منځ ښه یووالي او همغږي موجوده ده حې په وينا يې اوس د دې وخت رسيدلی چې موجوده نظام دا پاشلی ولس پر یوه ټغر راټول کړي.
