د بغلان ولایت له یو شمېر قومي مشرانو، دیني عالمانو او مخورو سره کتنه!
د سرحدونو او قبایلو چارو وزارت سرپرست محترم ملا نورالله نوري نن له غرمې مخکې د بغلان ولایت له یو شمېر قومي مشرانو، دیني عالمانو او مخورو سره د وزارت د کنفرانسونو په تالار کې وکتل.
غونډه دعظیم الشان قرآن د څومبارکو آیتونو په تلاوت پیل شوه.
ورپسې د بغلان ولایت قومي مشر محترم شیخ مولانا عبدالله عمري د نورو په استازیتوب په هېواد کې د اسلامي امارت د ټینګښت او د مجاهدینو د بریاوو او فتوحاتو له امله خوښي څرګنده کړه وی ویل: د بغلان ولایت خلکو همیشه د اسلامي امارت د مجاهدینو تر څنګ ولاړ و او په دې لاره کې یې بې شمېره قربانۍ ورکړي دي. نوموړي دغه راز د افغانستان د ټولو قومونو ترمنځ په اتحاد او اتفاق ټینګار وکړ او په بېلابېلو برخو کې یې خپلې یو لړ ستونزې د سرحدونو او قبایلو چارو له سرپرست وزیر سره شریکې کړې.
ورپسې د سرحدونو او قبایلو چارو وزارت سرپرست محترم ملا نورالله نوري د دوې له راتګ څخه د مننې په ترڅ کې وویل: د سرحدونو او قبایلو چارو وزارت ستاسو کور دی او دروازه یې تل ستاسو لپاره پرانیستې ده، د بغلان ولسونو د شل کلن اشغال او جهاد په دوره کې زیاته ونډه اخیستې، چې له وطن سره د دوې احساس د قدروړدی.
ښاغلی نوري دغه رازد اشغال دوران اوله امله یې په ټولنه کې راز راز ستونزو ته هم اشاره وکړه، وې ویل: جهاد یوازې د وینې بهول او جګړه نه ده، جهاد د دوو اساسي موخو لپاره ترسره شوی، چې یوه یې د پردو له سلطې او اشغال څخه د هېواد د خپلواکۍ ترلاسه کول او بله یې د اسلامي نظام ټینګښت دی، چې د پاک الله په نصرت سره موږ دغو دواړو موخو ته رسېدلې یو.
دغه راز ښاغلي نوري د خپلو خبرو په دوام وویل: افغانستان د ټولو افغانانو ګډ کور دی او افغانان به خپل هېواد په ګډه جوړوي . دا زموږ د ټولو هېواد والو اسلامي او هېوادني مسوولیت دی، چې ستونزو ته په ګډه حل لارې پیدا کړو او د هېواد د آبادلو او پرمختګ لپاره مټې راونغاړو.
وروسته د سرحدونو او قبایلو چارو وزارت د اطلاعاتو او ښوونې روزنې مسوول ښاغلي مولوي حضرت ولي حقاني د مجاهدینو مجاهدت او په دې لار کې د دې سرښندونو باندې رڼا واچوله وی ویل: اوس، چې د اسلامي امارت مجاهدینو د زرګونو شهیدانو په سرښندنې او الهي نصرت سره د اسلام او خلکو دښمنانو ته ماتې ورکړه نو په کار ده، چې د افغانستان ټول ولسونه سره لاسونو ورکړو او د اسلامي شریعت په رڼا کې د خپل هېواد د آبادۍ او سرلوړي لپاره نه ستړي کېدونکې هلې ځلې وکړو.
غونډه په هېواد کې د شرعي نظام د ټينګښت، پایښت او دوام په دعا سره پاې ته ورسېده.
