باميان ولايت کې د مسؤلينو په منځګړيتوب د شخړې حل
سه شنبه ۹ ربیعالآخر ۱۴۴۸
د بامیان ولایت په مرکز کې هغه شخړه، چې د یوې ترافیکي پېښې له امله رامنځته شوې وه او په پایله کې یې یو تن خپل ژوند له لاسه ورکړی و د ياد ولايت د سرحدونو، قومونو او قبایلو چارو آمریت استازو، دیني علماوو او قومي متنفذینو په منځګړیتوب حل او فصل شوه.
په دغه رامنځته شوې پېښه کې د قرباني شوي کس د کورنۍ لپاره د دعا ترڅنګ، دواړه لوري عفوې او بښنې ته وهڅول شوې. وروسته د دواړو لوريو څخه اختیار جرګې ته وسپارل شو تر څو قضیه د خبرو اترو له لارې حل شي.
د جرګې منځګړو او مصلحینو له هر اړخیزو خبرو او مشورو وروسته خپله پرېکړه دواړو لوريو ته واوروله، چې د دواړو خواوو له لوري ومنل شوه او په دې توګه، یاده شخړه په سوله ییز ډول پای ته ورسېده.
