په غزني ولايت کې د ارزو کلي د قومي مشرانو، دينې عالمانو او مخورو ستونزې واورېدل شوې!
د سرحدونو او قبايلو چارو وزير ښاغلي محب الله صميم غزني ولايت ته د خپل رسمي سفر په درېيمه ورځ د دغه ولايت د ارزو کلي قومي مشرانو، ديني عالمان او مخورو سره وکتل او د دوى ستونزې يې له نږدې واورېدې او دوی ته يې ډاډ ورکړ،چې ستونزې او غوښتنې به يې له اړوندو مقاماتو سره د حل په موخه شريکې کړي.
په دې کتنه کې يادو مشرانو لومړى ښاغلي محب الله صميم ته هر کلى او ښه راغلاست ووايه، چې غزني ولايت ته راغلی او د دوى ستونرې، غوښتنې، وړانديزونه او سلامشورې له نږدې اوري او د حل په موخه يې له اړوندو ادارو سره شريکوي.
ورپسې د سرحدونو او قبايلو چارو وزير وويل دا زموږ مسووليت او لومړيتوب دی، چې ستاسو ستونزو ته د حل لارې چارې پيدا کړو، غزنى زموږ او ستاسو ګډ کور دى، د هېواد هرې سيمې ته بايد په ګډه کار وکړو او له يو بل سره همکارۍ ته دوام ورکړو.
