په کنړ او ميدان وردګو ولايت کې دوه جلاجلا شخړې هوارې شوې
سه شنبه ۲۵ ربیع الاول ۱۴۴۸
د کنړ ولايت د سرحدونو، قومونو او قبايلو چارو رياست رئيس ملا تحميد الله غازي په مشري د دغه ولايت په اسمار ولسوالي کې د يوې ترافيکي پېښې له کبله راپورته شوې شخړه، چې په پايله کې يې يوې ماشومې نجلۍ خپل ژوند بايللی و حل او دواړه خواوې يې سره د سولې په ټغر کېنولې.
همداراز د میدان وردګو ولایت د جغتو ولسوالۍ اړوند په اریاب کلي کې د دوو کورنيو ترمنځ د ملکیت پر سر رامنځته شوې شخړه د ياد ولايت د سرحدونو، قومونو او قبایلو چارو آمریت د مسؤلینو، علماء کرامو او قومي مشرانو په ګډو هڅو د روغې جوړې له لارې حل او فصل شوه.
د دغې راپورته شوې شخړې د حل په موخه د سرحدونو، قومونو او قبایلو چارو آمر امین الله آخندزاده، د علماوو او مسؤلينو سره يوځای جغتو ولسوالي ته سفر وکړ، چې د ځايي خلکو او سپين ږيرو په شتون کې يې موضوع وڅېړله او د خير په فيصلې کولو سره يې ښکېل لوري سره پخلا کړل
