په کاپیسا ولایت کې ۱۱ کلنه دُښمني په دوستي بدله شوه
۲۶/۱۰/۱۴۴۵
د کاپیسا ولایت د کوهبند ولسوالۍ د دوو کورنیو تر منځ ۱۱ کاله مخکې رامنځته شوې شخړه چې له طرفینو څخه پکې ۴ کسان وژل شوي وو، د یاد ولایت د سرحدونو، قومونو او قبایلو چارو ریاست او یو شمېر نورو اداراتو د پاملرنې په نتېجه کې په دوستي بدله شوه.
د دغې بدي د څرنګوالي او تحقیق په موخه د ولایت مقام له لوري ځیني امنیتي اداراتو او د سرحدونو، قومونو او قبایلو چارو رئیس مولوي صدیق الله صیاد ته دنده سپارل شوې وه چې موضوع وڅېړي او د ښکېلو غاړو تر منځ روغه جوړه وکړي.
د یاد ریاست رئیس ښاغلي صیاد له دواړو لوریو سره وکتل، د قضیي په اړه یې معلومات ترلاسه کړل او د دوی تر منځ یې د خیر پرېکړه وکړه. یاده پرېکړه، د دواړو لوریو د منلو وړ وګرځېده او یو له بل سره یې د وروڼو په څېر د ژوند تېرولو ژمنه وکړه.
