په پروان ولایت کې له قومونو سره د همغږۍ او اتحاد غونډه جوړه شوه.
سه شنبه / ۲۸/ شعبان المعظم/ ۱۴۴۴
د سرحدونو قومونو او قبایلو چارو وزارت د جرګو او قبایلي چارو د همغږۍ معينيت د قومونو د يووالي او همغږۍ تر سرليک لاندې د خپلو کلنيو پلان شویو غونډو په ترڅ کې نن خپله وروستنۍ غونډه په پروان ولايت کې تر سره کړه.
په دې غونډه کې د پروان ولايت مسؤلينو، له مرکز او ولسواليو څخه راغلو سلګونه علماء کرامو او د قومي مشرانو تر څنګ د یاد وزارت د سرحدي پلټنو معين الحاج مولوي محمد اسماعيل غزنوي او د وزارت د رهبري هيئت ځينو نورو غړو هم برخه لرله.
د پروان د خلکو په نمايندګي څو تنو مشرانو خبرې وکړې او په ډاګه يې کړه چې د هيواد د نورو ولايتونو په څېر د پروان ولسونه هم د ا.ا.ا تر څنګ ولاړ دي، د بهرنيو استخباراتو په توسط په يو او بل نامه د مزاحمت کوونکو هڅې یې په ولسونو باندې بې اغیزې یادې کړې.
دوی په خپلو خبرو کې له حکومت څخه د دینې مدارسو او مکاتبو د پراختیا او انکشاف، د برېښنا او اوبو د بندونو د رغولو او د سالنګ د سرک د جوړېدلو، د جبل السراج د سیمټو د لویې فابریکې د بیرته فعالېدلو وړاندیز وکړ چې د یاد پلاوي لخوا د حل په موخه پوره ډاډ ورکول شو.
ورپسې د وزارت د دفتر رئیس شیخ حضرت ولي حقاني وویل: موږ ستاسې د خبرو د اورېدلو لپاره راغلي یو، غواړو ستاسې ستونزې واورو او د حل په موخه یې له لوړو مقاماتو سره شریکې کړو، نوموړي زیاته کړه: د دې نظام د اقامې لپاره افغانانو ډېرې قربانۍ ورکړې دي اوس باید د دې قربانیو ساتنه وکړي.
د ناستې په اخیر کې د یاد وزارت د سرحدي پلټنو معین ښاغلي غزنوي وویل: په افغانستان کې نننۍ ازادي د افغانانو په وینو راغلې ده باید ساتنه او درناوی یې وشي، د دغو قربانیو په لړ کې پروان ولایت هم مبارزه کړې ده او د اسلامي نظام د قائمېدلو لپاره یې ستړې کړې دي. هغه زیاته کړه: د سرحدونو قومونو او قبایلو چارو وزارت د ولس د یووالي او اتحاد لپاره شپه او ورځ کار کوي. ا.ا.ا په نوي کال کې د هیواد نیمګړو پروژو ته پوره توجه کړې ده. هغه د یادو شویو ستونزو د هوارولو په برخه کې خلکو ته ډاډ ورکړ او وعده یې وکړه چې د دوی غوښتنې به تر اړوندو مقاماتو رسوي.
د یادونې وړ ده چې د نننۍ غونډې له پای ته رسېدو سره د تېر کال د ټولو ولايتونو لپاره پلان شوې غونډې بشپړې او پلان په ښه توګه تطبيق شو.
