په غزني ولایت کې ۱۱ کلنې بدي ته د پای ټکی کېښودل شو
۲۵/۴/۱۴۴۵
د غزني ولایت د سرحدونو، قومونو او قبایلو چارو رئیس مولوي جان محمد مؤمن زاده د کوچیانو د ددو خېلونو تر منځ ۱۱ کلنه بدي په یاد ولایت کې د شخړو د حل کمېسیون په همکاري حل او په ورورګلوي بدله کړه. دغه شخړه د ښکېلو لوریو ترمنځ د ځمکې په سر، په داسي حال کې را منځته شوې وه چې په مالي زیانونو سربېره پکې دوو تنو ته مرګ ژوبله هم اوښتې وه.
د یادې بدي د حل په مراسمو کې ښاغلي مومن زاده د دواړو لوریو څخه راغلیو قومي مشرانو او نورو ګډونوالو ته په وینا کې وویل چې د قومونو تر منځ یووالی د هرې ټولنې د پرمختګ او بري راز دی. نوموړي په شخړه کې ښکېل لوري یو بل منلو او اخوت ته راوبلل او یادې موضوع حل یې د دوی د نسلونو خیر وباله.
ورپسې د قضیې دواړو لوریو خپل نظرونه څرګندل کړل، چې د کمېسیون له لوري د موضوع له تحقیق او څېړنې وروسته د دوی ترمنځ پرېکړه ونیول شوه، له نیول شوې پرېکړې څخه دواړو لوریو خوښي وښوده او یو بل ته غاړه غړۍ شول.
