پر ښوونيز مرکز باندې بريد د وحشت انتها ده!
په زياتې خواشينی سره خبر شوم، چې د هېواد، دين او تعليم دښمنانو نن مازديګر د کابل ښار د دیارلسمې امنیتې حوزې اړوند په پل خشک سیمه کې د کوثر په نامه یوه ښوونیز مرکز دروازې ته مخامخ ځانمرګې بريد کړی دی، چې له امله د ماشومانو او زده کوونکو په ګډون زموږ يو زيات شمېر بېګناه او معصوم هېوادوال شهيدان او ټپيان شوي ډي.
تروريستانو د خپلو وحشيانه جنايتونو په دوام نن يو ځل بیا وښوده، چې دوی د افغانستان د پرمختګ او تعليم دښمنان دي او نه غواړي، چې افغان بچيان د علم او پوهې په ګانه سمبال شي.
د سرحدونو او قبايلو چارو وزارت په داسې حال کې چې د هېواد او خلکو د دښمنانو دغه وحشيانه بريد په کلکه غندي، د لوی خدای ج له دربار څخه شهيدانو ته د فردوس جنت، ټپيانو ته بشپړه روغتيا او د شهيدانو وارثانو ته د خپل ژور خپګان مراتب څرګندوي.
محب الله صميم
د سرحدونو او قبايلو چارو وزارت سرپرست او نوماند وزير
