موږ ټول باید د جمهوریت تر پراخ چتر لاندې د خپل نظام، امنیتي او دفاعي ځواکونو، تېرو لاسته راوړنو او ملي بنسټونو ملاتړ وکړو!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې د هېواد د بېلابېلو قومونو له مشرانو او مخورو سره د کتنې پر مهال وکړې.
په دې کتنه کې د راغلو مشرانو په استازیتوب څو تنو خبرې وکړې وې ویل: تل مو له خپلو قومي شوراګانو څخه د نظام، امنیتي او دفاعي ځواکونو، پراختیايي پروژو او د حکومت له برنامو څخه خپل ملاتړ څرګند کړی دی او لا هم د خپلو ملي ارزښتونو او ملي ګټو ملاتړ کوو. دوی همدارنګه خپلې یو لړ سیمه ییزې ستونزې د حل په موخه له ښاغلي صمیم سره شریکې کړې.
ورپسې محترم محب الله صمیم خبرې وکړې وې ویل: موږ ټول باید د جمهوریت تر پراخ چتر لاندې له خپل نظام او امنیتي ځواکونو څخه ملاتړ وکړو او هېچا ته باید د دې اجازه ورنکړو، چې زموږ ملي بنسټونه ونړوي او د هېواد د پرمختګ پر وړاندې خنډ شي.
ښاغلي صمیم زیاته کړه: د ترهګرۍ او ظلم پر وړاندې ولسي بسیج مو له کاري لومړیتوبونو څخه دی او په دې اړوند د ولسونو منځ ته ورغلی یم او هڅه مو دا ده، چې ټول په یو واحد او پیاوړي صف کې سره متحد کړو، تر څو د همدې مشرانو په سلا مشورو په هېواد کې شته بېلابېلو ستونزو ته په ګډه د حل لارې پیدا کړو.
په پای کې یې دوی ته ډاډ ورکړ، چې شته بېلابېلې سیمه ییزې ستونزې به مو د حل په موخه له اړوندو ادارو سره شریکې کړم.
