مثبت اصلاحات د وخت غوښتنه ده!
د وزارت اداري مجلس د سرحدونو او قبایلو چارو وزیر ښاغلي محمد شفیق ګل اغا شېرزي په مشرۍ ، د دغه وزارت د مرستیالانو ، سلا کارانو او رئیسانو په ګډون جوړ او په مثبتو اصلاحاتو یې ټینګار وکړ.
ددې اونۍ اداري مجلس د اصلاحاتو نوې پروژې ته ځانګړی شوی و، په پیل کې د وزارت سلا کار ښاغلي حمید الله بارکزي د پروژې کار او فعالیت ته د زمینې د برابرولو په برخه کې د وزارت له رهبرۍ په ځانګړې توګه مسلکي معین ښاغلي ډاکتر فریدون بارکزي او په دې برخه کې د هغه له هڅو څخه مننه وکړه.
ورپسې د اصلاحاتو د نوې پروژې مسول ښاغلي جمال الدین ملت د یادې پروژې د اساسي موخو او فعالیتونو په اړه پرزنتیشن وړاندې کړ.وې ویل:چې بدلون راوستل ، پراختیا او پرمختګ ته زمینه برابرول د روڼتیا په موخه ګامونه اوچتول ، د نیمګړتیا وو شتخیصول او د له منځه وړلو لپاره یې هڅې کول، د کاري ظرفیت لوړول او په دې اړه مشورې ورکول د دغې پروژې له موخو څخه دي .
همدا راز د پروژې د چارو همغږي کوونکي ښاغلي محمد ابراهیم تامیل هم د پروژې د تشکیلاتي جوړښت ، کارکوونکو د زده کړې کچې ، تجربو ، کاري مخینې او وړتیا وو په اړه معلومات وړاندې کړل.
وروسته د وزارت مسلکي معین ښاغلي ډاکتر فریدون بارکزي د وخت د اړتیاوو سره سم یاده پروژه ډېره مهمه او ارزښتناکه وبلله وې ویل: چې د هېواد ولسمشر جلالتماب محمد اشرف غني هم په دې ټینګار کوي چې ادارې باید پرمختللې وي، د وخت سره مناسب مثبت بدلونونه او اصلاحات باید پکې راشي ، ترڅو هېواد او اولس ته غوره خدمتونه وړاندې کړي. او دا پروژه هم د همدې موخې لپاره منظور شوې ده ، چې په چارو کې اصلاح او سمون راشي او نیمګړتیاوې له منځه ولاړې شي. همدا راز یې له اړوند ادارو وغوښتل چې له پروژې سره د معلوماتو په شریکولو کې همکار اوسي.
د سرحدونو او قبایلو چارو وزیر ښاغلي محمد شفیق ګل اغا شېرزي هم پخپلو خبرو کې د اصلاحاتو نوې پروژه په چارو کې د مثبتو بدلونونو دراوستلو لپاره ګټوره وبلله وې ویل: ښوونه او روزنه ، وړتیا او کاري ظرفیت د غوره خدمت کولو لپاره ډېر اړین دي.همدا راز یې په اداره کې د کارکوونکو تر منځ په مسلکي سلوک ټینګار وکړ وې ویل، چې هر کارکوونکی مکلف دی چې د قانون او اداري اصولو پر بنسټ خپله دنده مسولانه پرمخ یوسي. همدا رازیې د چارو په پر مخ بېولو کې په همکارۍ او همغږۍ ټینګار وکړ.
یاد مجلس د تلپاتې سولې د ټینګښت او په چارو کې د اصلاح او سمون په دعا پای ته ورسېد.
